କବି: ଗାୟକ ପୁରାଣଭୂଷଣ ଶରତ ଚନ୍ଦ୍ର ଦାଶ
ରଇଁଶୋଲ, ପିପିଲି, ପୁରୀ, ୭୫୨୧୦୪
ଯୋଗାଯୋଗ= ୯୮୬୧୪୭୦୫୦୫
୮୭୬୩୩୩୧୦୩୭
ଲେଖାର ସମୟ- ୨୭/୦୮/୧୯୮୭
ଭାବେପଢ଼ ଭାଗବତକୁ,
ଭବସାଗରର ମୂଳପୋତକୁ ।
ଭୁବନ ମୋହନ- ମାୟା ବିନାଶନ
ଭଙ୍ଗୀରେ ଦେଖିବୁ ପଦ୍ମନେତ୍ରକୁ ।।୦।।
ଭାଇବନ୍ଧୁ କୁଟୁମ୍ବ ନେଇ,
ଭାବେ ପଡି ହୋଇଛୁ ବାଇ ।
ଭାଗବତେ ଚିତ୍ତ ନଦେଉ ଉନ୍ମତ୍ତ
ଭୟ ରହିଯିବ ବୈବସ୍ଵତକୁ ।।୧।।
ଭାନୁଜ ପାଶରୁ ମୁକତି-,
ଲଭି ଉଦ୍ଧରିବୁ ଝଟତି ।
ଭକତି ଭାବରେ ଭଜ ତୁହି ଥରେ
ଭାଗବତତତ୍ତ୍ଵ ମୂଳବିତ୍ତକୁ।।୨।।
ଭାଗବତ ଗୀତାର ମୂଲ୍ୟ,
ସର୍ବତ୍ର ଅଟଇ ଅତୁଲ୍ୟ ।
ଭାବ ତା ଜଟିଳ କରିଛି ଯେ କଳ
ଭଲେ ସେ ଜାଣିଛି ତାର ତତ୍ତ୍ଵକୁ ।।୩।।
ଭାଙ୍ଗିଯିବ ଯେତେ କଳୁଷ,
ଲଭି ଭଗବତ ଆଶିଷ ।
ଭରସା ବଢ଼ାଇ ଶରତ କହଇ
ଭାଗବତ ପାଠେ ରଖ ଚିତ୍ତକୁ ।।୪।।