ନର୍ତ୍ତକୀନୃତ୍ୟ ଦର୍ଶନେ ରସିକ ଭାବନା (ରମାକାନ୍ତ ମିଶ୍ର)

କବି: ଗାୟକ ବିଦ୍ୟାଭୂଷଣ ରମାକାନ୍ତ ମିଶ୍ରଶର୍ମ୍ମା

ନାଗରୀ ରଜା ମଜ୍ଜା,
          ମଜ୍ଜା ହଜାଇ ଦେଲାରେ  ।
ତା ତା ଥେଇଥେଇ  ତାଥେଇ ତାଥେଇ
ପାଦ ଝୁମୁକାକୁ,
             ବଜାଇ ଦେଲାରେ  ।।୦।।

ମାରିଦେଲା ନୟନ ଠାର,
       ସେ କି ମାର ରାଜାକୁଠାର ।
ଓଠରେ ଫୁଟାଇ ମୃଦୁ ମୃଦୁ ହସ
     କାମାନଳ ତାପେ,
             ଭଜାଇ ଦେଲାରେ  ।।୧।।

ଗୋଜା ଗୋଜା ଉରଜ ଯୋଡି,
          କାଞ୍ଚଲାକୁ ଦେଇଛି ଭିଡ଼ି ।
ବେଳେ ବେଳେ ନୃତ୍ୟ,     
           ତାଳେ ତାଳେ ସେତ ।
ନାଚି କାମ ବିଷ,
         ଭୁଞ୍ଜାଇ ଦେଲା ରେ  ।।୨।।

ହଲି ହଲି ନହକା କଟି,
        ଯାଉଅଛି ଶୋଭା ଚହଟି ।
ଜଟିଆଙ୍କ ଦମ୍ଭ ହଟାଇ ଦେବାକୁ
       ମାର କି ଏହାକୁ
          ଖଞ୍ଜାଇ ଦେଲା ରେ ।।୩।।

ନାଚୁଥିଲା ଚରମେ ବେଣୀ,
        ଗୁଣୀ ଚିତ୍ତେ ଜହର ବୁଣି ।
ଅପୂର୍ବ ତା ପାଣି- ଅଭିନୟ ଠାଣି
        ରମାକାନ୍ତ ମନ,
          ରଞ୍ଜାଇ ଦେଲା ରେ   ।।୪।।