ଯୋଗମାୟା ଗୋ (ରମାକାନ୍ତ ମିଶ୍ରଶର୍ମ୍ମା)

ଦେବୀ ବନ୍ଦନା
କବି: ଗାୟକ ବିଦ୍ୟାଭୂଷଣ ରମାକାନ୍ତ ମିଶ୍ରଶର୍ମ୍ମା
ଜଟଣୀ, ଖୋର୍ଦ୍ଧା

ଯୋଗମାୟା ଗୋ,
              ଯୋଗେଶ୍ୱରୀ ଭବାନୀ  ।
ଭୀମା ଭଇରବୀ   ଭୂତେଶ ବାନ୍ଧବୀ
ଦୁଃଖ ନିବାରିଣୀ ତୁ ଭୁଆଷୁଣୀ        ।।୦।।

ଶର୍ବାଣୀ ତୁ ସର୍ବମଙ୍ଗଳା,
          ଗଳାରେ ତୋ ମନ୍ଦାରମାଳା  ।
କଳା କାଛେଣୀକୁ   ବାଛି ପିନ୍ଧିଥାଉ
କରେ କଳାକାଚ କଟି କିଙ୍କିଣୀ       ।।୧।।

କରେ ଖଣ୍ଡା ଖର୍ପର ଧରି,
              କର୍ବୁର କୂଳକୁ ସଂହାରି  ।
ବିଶ୍ୱେ ଶାନ୍ତି ବାରି   ସେଚନ କରୁ ମା'
ବିଶ୍ଵବନ୍ଦନୀୟା ବିଶ୍ଵଜନନୀ           ।।୨।।

କେତେ କବି ତୋ ନାମ ଗାଇ,
             ତୋର ପାଦପଙ୍କଜ ଧ୍ୟାୟି  ।
ମରତେ ଅମର     କୀରତି ରଖିଲେ
ଦେଖାଇଲେ ଅଦଭୂତ କରଣି      ।।୩।।

ଗଜରିପୁ ବାହନେ ବିଜେ,
        ଆଭରଣେ ଅଙ୍ଗ ବିରାଜେ   ।
ରମାକାନ୍ତ ଡକା    ଶୁଣିମା କାଳିକା
ଦକା ନାଶି ପକା ଉତ୍ତରାୟଣୀ      ।।୪।।