କଣିଆଁଇ ଚାହାଁନାତୁ (ରମାକାନ୍ତ ମିଶ୍ରଶର୍ମ୍ମା)

ରସିକାପ୍ରତି ରସିକର ଉକ୍ତି
ଆଦ୍ୟେ"କ"ନିୟମେ
କବି: ଗାୟକ ବିଦ୍ୟାଭୂଷଣ ରମାକାନ୍ତ ମିଶ୍ରଶର୍ମ୍ମା
ଜଟଣୀ, ଖୋର୍ଦ୍ଧା

କଣିଆଁଇ ଚାହାଁନାତୁ,
              କରକ ରଦନୀ ବାଳା  ।
କେକୀ ପୁଚ୍ଛ କୁନ୍ତଳା ତୋ,
          ଚାହାଁଣି ମରମ ଜଳା       ।।୦।।

କମଳନୟନୀ ବାଳା,
          କରନା ଉରକୁ ଶିଳା  ।
କୁଚ କୁଧର ତୋହର,
        ଯତି ମତି ଧୈର୍ଯ୍ୟ ଟଳା    ।।୧।।

କୃଶ ଉଦରେ ରୋମାଳି,
       କାଳିନାଗୁଣୀ କି କଳି  ।
କରଇ ପ୍ରବେଶ ନାଭୀ-
        ବିଳେରେ ନବ ଛଇଳା    ।।୨।।

କାର୍ମୁକ ସମ କାମର,
         କମନୀୟ ଭୂରୁ ତୋର ।
କଟାକ୍ଷ ଶର ଚାଳିଲେ,
          ମୁନିଏ ହେବେ ବାଉଳା   ।।୩।।

କରୁଣା କରିଲେ ଊଣା-,
           କରିବି ମାର ଯନ୍ତ୍ରଣା ।
କହେ ରମାକାନ୍ତ ବଣା,
      କଲୁ ମୋତେରେ ମହିଳା   ।।୪।।