ଜଗନ୍ନାଥ ହେ (ରମାକାନ୍ତ ମିଶ୍ରଶର୍ମା)

ବ୍ୟାଜ ସ୍ତୁତି
କବି: ଗାୟକ ବିଦ୍ୟାଭୂଷଣ ରମାକାନ୍ତ ମିଶ୍ରଶର୍ମା

ଜଗନ୍ନାଥ ହେ,
           କାଠ ପାଲଟି ଗଲ ।
ଦୁଇ ଭାରିଜାରେ   ଘର କିଏ କରେ
ଭାରିଜା ଡରରେ କି କଲବଲ       ।୦।

ଭଣ୍ଡାର ଘରକୁ    ଦୁଇଭାଗ କରି
ଦୁଇ ଭାରିଜାରେ ବାଣ୍ଟି ଥୋଇଲ ।
ଧନେ ସାମନ୍ତାଣୀ  ସିନ୍ଧୁଜେମା ହେଲେ
ଶାରଦାରେ ବିଦ୍ୟାଭଣ୍ଡାର ଦେଲ    ।୧।

ଚଞ୍ଚଳା ସ୍ୱଭାବେ   ସାଗର ଦୁଲ୍ଲଣୀ
ବାରଘର ବୁଲି ଯାଉଛି ବେଳ ।
ଆଉ ଜଣେ ତୁମ୍ଭ    ମନ ମୋହିବାକୁ
ବୀଣାରେ ତୋଳୁଛି ସୁରଝଙ୍କାର    ।୨।

କୁସୁମ କାଣ୍ଡକୁ    ଧରି ଟୋକା ଖଣ୍ଡ
ବ୍ରହ୍ମାଣ୍ଡକୁ କରଇ ହୁର ଜୁର ।
ସାପୁଆ କେଳା ପରାଏ ଲୀଳା କରି
ଅନନ୍ତ ଉପରେ ଶୟନ କଲ      ।୩।

ସାଗର ଗରଭେ   ଘର କରିଅଛ
 ଗରଜନେ କାନ ହୁଏ ବଧିର ।
ଚଡେଇ ବାହନ   ବଡେଇ ଦେଖାଏ
ସର୍ପ ଭଗାରି ସେ ତୁମ କିଙ୍କର     ।୪।

ଘର କଥା ଭାଳି   କାଠ ପାଲଟିଲ
କା କଥା ବୁଝିବ କଳା ଠାକୁର ।
ବୁଝ ବା ନ ବୁଝ   ଡାକିବା ମୋ କାମ
ଡାକି ଯାଉ ରମାକାନ୍ତର କାଳ     ।୫।