ହୋରି ରଙ୍ଗେ ବିହରି

ହୋରି ରଙ୍ଗେ ବିହରି

କବି- ଗୋପାଳକୃଷ୍ଣ ପଟ୍ଟନାୟକ
ରାଗ- ମୋହନା 
ତାଳ- ରୂପକ

ହୋରି ରଙ୍ଗେ ବିହରି    ।    ହରି ସଙ୍ଗେ ଶ୍ରୀକିଶୋରୀ   ।।ପଦ।।
ପବନେ ଚଳି   ।    ଚମ୍ପକ ବଲ୍ଲୀ   ।   ତମାଳେ ଢ଼ଳିଲା ପରି ।।୧।।
ପଶୁପୀବାଳା    ।    ଚପଳା ମାଳା   ।   ଘନକୁ ଘେରିଲା ପରି  ।।୨।।
ହେମାବ୍ଜ ବନ   ।    ବୟସୀ ଜନ   ।   ମଧୁବ୍ରତ ଗିରିଧାରୀ   ।।୩।।
ଫିଙ୍ଗୁ ଅବିର    ।    ବ୍ରଜ ସୁନ୍ଦର    ।   କଞ୍ଚୁଳୀ ଗଳି ବାହାରି  ।।୪।।
ଶ୍ରୀରାଧା ଫିଙ୍ଗୁ  ।    ମୋହନ ଜଗୁ  ।   ବାଜି ହୃଦୟେ ସଞ୍ଚରି  ।।୫।।
ଜଳଯନ୍ତର      ।    ଧରି ରତ୍ନର    ।    ବିଞ୍ଚନ୍ତି ପନୀର ବାରି  ।।୬।।
ଗୋପାଳକୃଷ୍ଣ   ।   ନୟନ ତୃଷ୍ଣ     ।    ହୋଇଲା ସେ ଶୋଭା ସ୍ମରି ।।୭।।