ଚାଟୂକ୍ତି: ଫୁଲ ମାଳିକା (ରମାକାନ୍ତ ମିଶ୍ର)

(ଫୁଲ ମାଳିକା)
କବି: ଗାୟକ ବିଦ୍ୟାଭୂଷଣ ଶ୍ରୀଯୁକ୍ତ ରମାକାନ୍ତ ମିଶ୍ରଶର୍ମ୍ମା

ମନ୍ଦାର ଅଧରା ଆସ,
        କୁନ୍ଦହାସ ପରକାଶ ।
ମଲି ଫୁଲଶରେ ଗୋରି
      ନକର ଆଉ ନିରାଶ   ।।୦।।
କାନ୍ତି ତୋ କେତକୀ ଜିଣା,
      ନୀଳନଳିନ ନୟନା ।
କମଳମୁଖୀ ମୋଚିତ୍ତ
      ଅଶୋକ କର ପ୍ରକାଶ  ।।୧।।
ଉର ରସଗୋଲାପରେ,
       କର ମୋ ଥୁଆଇ ବାରେ ।
ହେମଚମ୍ପକ ବରନା
        ଭାଷ ଥରେ ପ୍ରେମ ଭାଷ  ।।୨।।
ଯାଇ ନପାରିବିସଖି,
       ପ୍ରେମ ଯୁଇରେ ପରଖି ।
ସୁନାରୀରେ ସୁନାଗର
       ସୁନା ପଣକୁ ମୋ କଷ   ।।୩।।
ତମାଳକେଶି ମଣ୍ଡାଇ,
       ଗଳାରେ ବାହୁ ଭଣ୍ଡାଇ ।
ନଦିଅତୁ କନିଆଁରେ
       ନିଆଳୀ ଅଳି ନନାଶ  ।।୪।।
ଗଙ୍ଗଶିୟୁଳି ମଉଳି,
       ନାଗେଶ୍ଵରେ ପୂଜାକରି ।
ହେ ନାଗରି ରମାକାନ୍ତ
       ତୋତେ କରିବକି ତୋଷ   ।।୫।।